1. He “Thinlung Hliam” movie tur hi Kristian Lovestory tura duan a ni a. He thawnthu-ah hian
Dika’n Mawitei(hmangaih nei lai) a neih tak avanga harsatna hrang hrang lo piang tarlanna a ni.
2. Mawitei,College zirlai chuan a thiannu zarah sipai captain Huntera nen chuan an inhmangaih ta
em em a, inneih hial tumin an pahnih inkarah thu an thlung dun nghe nghe a. An thuthlun erawh nu
leh pate hriatpuina a ni hran lova.
3. Dika, MZU a master degree zirlai chu, a nu boral hnu kum pawh a tlin hmain a pa chuan nupui
neih a tum thu a hrilh avangin rilru na chuan tuaiah insiam derin apa nupui neih ni chuan a thian
tuaite nen chuan inneih niah an inthehthil vel a, chu chu a pa chuan a haw hle,mahse a nuhrawn fing
tak chuan lo man thiamin an fapa chu tuai tak tak ni lovin apa runluih nana a thiltih mai a ni tih a hre
ru a. Chuvangin a pasal chu thurawn pein an fapa Dika tan nupui neihsak a rawtthlu ta a. Chuta an
monu tur chuan Dika Pa hnuaia thawk a peon Pu Rualhleia fanu Mawitei chu an be thlu ta.
4. Mawitei chu a nu leh pa ten pasal a nei dawn tih an hrilh chuan a rilru a na em em a, awm ngaihna
pawh a hre lo, a nu leh pa te hnenah pasal neih a la duh loh thu leh hmangaih a neih ve tawh thu a
hrilh hnu pawhin a nu leh pa te chuan an tum chu thulh an tum lo va, atana tha zawk tur a nih thuin
thutlukna chu an siam hmiah. Chutih laiin a hmangaih em em Huntera chuan sipai hmun atangin
pasal nei lo tura nasa taka rawn nawr vein Mawitei nen chuan lungngai takin an in be thin a.
5. Mawitei beidawng lutuk chuan a thiannu Jane-i te inah tlan lutin a rilru mangna vawrtawp chu
Jane-i leh anu chu a hrilh a, Huntera pawh a be ngam tawh lo. Jane-i nu chuan Mawitei chu a nu leh
pa thu zawm mai tur leh chu chu nakin hun lokal zel tur atan nu leh pa thuawih chu malsawmna a
nih thuin a lo hnem a, Mawitei chuan pawm harsa a ti hle.
6. Dika chuan a vawikhat hmuhna atangin Mawitei chu a zunah a uai nghal a. An inneih niah pawh
Dika chu a hlim sang reng a, Mawitei erawh a mitthlaah Huntera sakhmel a cham reng a. Inneih
lawmna after party ah pawh Dika hmel a nuih reng laiin Mawitei hmel erawh a ngui kher mai.
Mahsela, mipui zinga a nu leh pa hlim hmel a hmuh chuan Mawitei mi rilru tha na na na chuan a nu
leh pa hlimna chu tawmpuiin hlim hmel a pu ve thei ta.
7. Dika chuan a nupui Mawitei’n hmangaih ve lo mahse amahin a hmangaih em avang chuan
dawhthei takin Mawitei hmangaih let ve hun tur chu ni tin beiseina nen a nghak thin a. Mawitei
erawh zawngin a thinlai luahtu Huntera bak a ngaihtuah thei lo. Mawitei’n a hmangaih ve thei tawh
ang e tia hma a han lak chang te hian a hlawhchham leh fo thin a, mahse a hmangaihna chuan
chhelna a siam a, a nghak fan fan a.
8. Hun a liam zel angin Huntera pawh rawn chhuti-in Mawitei nen an in hmu dun fo mai a. Ni khat
chu Mawitei chu sipai hmuna hruaithlak tuma a han sawm chu Mawitei chuan an khawsak dan fo
chu tha a ti lovin Huntera sawmna chu a hnar ta a. An inkar a hmangaihna awm reng pawh chu
tihtawp a rawt ta a. Chu chu hrethiam lovin Huntera chuan Mawitei chu hmeichhe daw thei leh
rinawm lo,amah bum aaa vektu a ngaiin kut a thlak ta hial a.
9.Mawitei’n Dika lam hawia a thinlung a pek mek lai leh Dika pawh hlim taka hun hmanchhoh
tuma a inbeisei laiin Huntera chuan Dika hnenah dawt thu phuahchawp hmangin Mawitei chu a
duh hun huna mutpui thin thu leh, tunah pawh a fa thla hnih mi a pai mek thu a han hrilh zet chu
Dika thinlung chu a na kher mai.
10) Dika chuan Mawitei chu thu dik a nih leh nih loh pawh zawt hmasa lovin nasa takin a chhuahchhal
nghal a. Mawitei chuan thu dik hrilh a tum pawhin a ngaihthlaksak duh lova, tichuan Dika chuan
Mawitei chu “Ka then che”tiin a hrilh ta phawng mai a. Mawitei rilru na lutuk chuan Dika te in chu
a chhuansan ta a ni.
11) Chutia Mawitein in a chhuahsan hnu chuan Dika chuan a tuar thiam lo hle a. Chutiang bawkin
Huntera pawhin Mawitei’n a then chu na a ti hle bawk a. Mawitei chuan Huntera chu hmuhfalpui
leh in, eng vanga Dika hnena dawt thu lo hrilh ta mai nge a nih tih leh amah vanga an nupa an inthen
phah thu a hrilh a. Chu thu a hriat chuan Huntera chuan Mawitei chu a hnena lo kir leh mai tura a
beisei thuin a chhang a. Mahse a rin loh lam daihin Mawitei chhanna chu a dawng ta... Chatuan atan
Huntera chu then hlen a tum tawh thuin Mawitei chuan a lo chhang ta si a.
12) Dika chuan Mawitei rilru na lutuk hmun fianril a awm chu a va pan hnai a, ngaihdam a dil a. A
hmangaih thu leh a fa pai mek pawh a fa anga a pawm theih thu a han hrilh chu, Mawitei chuan a la
thianghlim thu leh tu fa mah a pai loh thu a lo chhangin amah zawk chu ngaihdam ngai a nih thu leh
hun rei tak Dika hmangaihna a chhan lawk loh avanga hrethiam turin a lo ti ve a. Ti chuan Dika leh
Mawitei chu inhrethiam tawn takin an inpawm ta vawng vawng a.
